Khaarijintii Khaldantay. Qaybtii #4aad

Waa dhacdo dhab ah oo uu buugiisa 'Labyrinth of Power' ku qoray Danny Yatom, madaxii hore ee hay'ada sirdoonka Yuhuuda ee loo yaqaan Mossad. Waan soo turjumay, si aan rasmi ahayn, waanan soo koob koobay.

Sidan ayuu ku bilaabay qoraagu:

Hawl fuliyeyaashii Mossad kuwii ugu fiicnaa ayaa loo diray hawl galka, gaar ahaan hawl fuliyeyaal ay leedahay waaxda hawlgalada. Waxay ahaayeen [waa hawl fuliyeyaasha e] labeenta sirdoonka Israel. Hawl fuliyeyaal khibrad sare leh, intooda badanina waxay kasoo qayb qateen hawl galo aad u qasan oo aad u halis badan. Hawl fuliyeyaashani waxay lasoo shaqeeyeen cutubyada khaaska ah ee ciidamada difaaca Israel (IDF), kadibna waxay qaateen tababaro baaxad leh oo gaadhsiisan heerarka ugu sareeya ee Mossad ee daafaha dunida. Markii diyaar garowgii dhamaaday, kooxdii hawl fuliyeyaasha ahaa waxay u amba bexeen Jordan si ay u dhamays tiraan hawl galka.

Subaxnimadii Septermber 25, 1997 oo ahayd maalintii loogu tala galay in kooxdu kasoo amba baxaan Jordan [dabcan markay dhameeyaan hawl galka] waxa kooxdii hawl galka fulineysay lagu war geliyey in Mashal uu ku sii socdo dhanka xafiiskiisa, gaadhigana uu ku weheliyo dareewalkiisa oo keliya.

Markay kooxdii hawl gal ku bilaabeen diyaar garowgii, ayaa waxa dhacday nasiib daradii ugu horeysay. Kooxdii warka soo tebinaysay [ee Khaled Mashal dusha kala socotay] waxay ku guul dareysteen in ay ogaadaan in laba caruura oo Mashal dhalay ku wehelineysay gaadhiga. Hawl fuliyeyaashu waxay diyaar ku ahaayeen goobtii loo qorsheeyey waxayna sugeen inta Mashal ka imanayo.

Markii uu yimi ee uu u dhaqaaqay halka laga galo dhismaha xafiiskiisa, ayaa ragii fulineyey khaarajintu ka daba dhaqaaqeen. Mid ka mid ah ayaa gacanta sare u qaaday si uu [xaga dambe] ugaga dhufto Mashal. Darawalkii Mashal ayaa arkay gacanta kor loo qaaday ee Mashal lagaga sii dhufanayo xaga dambe, kadibna af labadii ayuu furtay oo qaylo ayuu ka rogay. Mashal ayaa dib usoo jeestay [markuu qayladii maqlay] wuxuuna dareemay in wax dheceen. Inkasta oo aannu garan waxa dhacay waxa uu yahay, hadana cagta ayuu furay oo wuu ka cararay goobtii.

Mashal wuxu u laabtay dhanka midig; wuuna cararay. Hawl fuliyeyaashii [oo ahaa laba nin] waxay si deg deg ah ugu soo dhaqaaqeen dhankii gaadhigoodu yaalay. Markay soo gaadheen cidhifka dariiqii yaraa ee gaadhigoodu yaalay, waxa goobta soo gaadhay Mohamed Abu Seif, oo ahaa fariin side ka socday xarunta taliska guud ee Hamaz oo waraaqo u siday Mashal. Wuxu maqlay qayladii darawalka iyo dadka isku xoonsan. Wuxu kaloo arkay Mashal oo dhan u cararay iyo labadii nin ee hawl fuliyeyaasha haa oo dhankiisa usoo ordaya.

Muu fahmin waxa meesha ka dhacay, wuxu se dareemay in labadan nin ee xagiisa usoo ordayaa ay ku lug leeyihiin waxa meesha ka dhacay ee Mashal lagula kacay. Wuxu isku deyay in uu labada nin jidka ka xidho isaga oo kala fidinaya labadiisa adin si uu jalaafo ugu dhigo. Hawl fuliyeyaashii way dhinac mareen. Waxay galeen gaadhigii. Waxayna qaateen go’aan aanay ka fiiirsan. Waxay go’aan sadeen in aay u kicin xagii hotel-koodii, sidii markii hore qorshuhu ahaa, laakiin waxay go’aan sadeen in ay dhawr jeer oo kale sii laab laab taan kadibna dhuuntaan.

Waxay ka baqeen in Abu-Seif uu waco Police-ka, kadibna la qabto oo la xidho haddii ay hotelkii ku tagaan gaadhigan. Markii ay laba jeer laabteen, ayay dareemeen in ay nabad yihiin kadibna debeda ayay uga soo bexeen gaadhigii. Dareewalkii wuxu sii waday gaadhigii, isaga oo raadinaya meel uu gaadhiga dhigo oo uu kaga baxsado [si aan gaadhiga loo soo helin].

Arintani waxay ahayd khalad go’aamineed oo ay sameeyeen labadii hawl fuliye, maadaama oo xitaa haddii fariin siduhu [waa Abu-Seif e] qoro taarikada numberka gaadhiga, ay haysan lahaayeen wakhti ku filan oo ay goobta kaga baxsadaan ka hor inta aan Police-ku helin warbixinta. May jirin baahi gaadhiga ay ugaga tagaan meel 200 oo meter u jirta goobta.

Waxa aanay labada nin ogeyni [waa labadii loo soo diray in ay hawsha fuliyaan e] in Abu-Seif, oo sida warbaahintu sheegtay loo dalacsiiyey ilaalada gaarka ah ee Mashal, horena u ahaan jiray dagaalyahan kasoo dagaalamay Afghanistan, uu eryanaayay ilaa iyo intii ay soo carareen.

Labadii nin ee hawl fuliyeyaasha ahaa waxay go’aansadeen in ay iskala qaybiyaan oo midba dhan ka socdo wadada. Abu-Seif ayaa mid ka mida labadii nin kusoo baxay. Shaadhka ayuu ku dhegay, kadibna wuxu u qayshaday dadkii wadada marayay isagoo ku qaylinaya in ninkani wax soo yeelay Mashal. Hawl fuliyihii dhinac ayuu isaga tuuray Abu-Seif, kadibna kii kale ee wadada dhinaca ka socday ayaa soo cararay oo Abu-Seif ku tuuray god wadada dhinaciisa ku yaalay, madaxa ayaanu ka dakhramay. Kii labaad ayaa kusoo foorarsaday Abu-Seif kadibna xuurto ayuu qoorta kaga qabtay isaga oo rabay in uu si fudud uga takhaluso.

Waxan oo dhami waxay dheceen in ku siman il bidhiqsiyo, balse wakhti ku filan ayay ahayd in boqolaal qof soo xoomaan; [waa la qiyaasi karaa] dabeecadaha nolosha ee wadooyinka waaweyn ee magaalooyinka carbeed. Muuqaalka laba ajinabiya oo dilaya nin carbeed ayaa abuuray jewi cadawtinimo oo ku hareereesan labadii nin.

Way sii daayeen Abu-Seif, laakin waxa ku hareereesan boqolaal qof. Si lama filaana ayaa waxa u yimi askari Police ah oo kasoo dhex maquuray dadkii meesha ku xoonsanaa. Labadii nin ayuu dadkii kasoo dhex saaray. Wuxu u wacday taksi, kadibna saldhiga Police-ka ee ugu dhowaa ayuu u qaaday labadii nin iyo ninki dhaawaca ahaa oo isagu markaas miyir la’aa [waa Abu-Seif e].

Labadii nin ee hawl fuliyeyaasha ahaa waxay qiyaasteen in haddii ay wax talaabo ah ku dhaqaaqaan inta ay kusii socdaan saldhiga Police-ka, ay sababi doonto eryad lagu dhex eryado Camaan [arin aanay u babac dhigi kareen]. Waxayna isku qanciyeen in marka ay saldhiga gaadhaan ee uu Abu-Seif soo miyir sado lagu sii deyn doono daqiiqado gudahood, kadib marka ay Police-ka ku qanciyaan in ninkani iyaga soo weeraray. Si kastaba, waxa la geeyey saldhigii Police-ka.

Askariigu wuxu aaminsanaa in uu gudanaayo waajibkiiisa shaqo. Waxa u cadayd askariga in Abu-Seif labada nin soo weeraray, wuxuuna isku dayey in uu ku qanciyo [waa labada nin ee hawl fuliyeyaasha ahaaye] in ay xareeyaan dacwad ka dhan ah fariin sidaha bilaa miyirka ah. Nasiib daradooda, waxa miyir kii usoo noqday Abu-Seif oo ladnaaday, wuxuuna ka dhawaajiyey in uu u malaynayay in labadan nin ay rabeen in ay Mashal wax yeeleeyaan. Dacwadaha kala duwan ee iska soo horjeeda awgeed iyo weliba magaca Mashal ee laga dhwaajiyey darteed, waxay askartii go’aan sadeen in baadhitaan dheeraada lagu sameeyo labada nin iyo Abu-Seif ba.

Mudo yar ka dib, Mr. H., [magaca uu qoraagu ogaan u qariyey] ayaa xafiiskayga igala soo baxay. Wuxu igu war geliyey sida wax u dheceen. Wuxuuna iga codsaday in aanu qaar ka mida hawl fuliyeyaasha u daad gureeno dhanka safaarada. Anaga oo ka werwersan in la xidho xuduudka aanu la leenahay Jordan, isla markaana aanay suurta gal ahayn baxsi xaga cirka iyo dhulka ah, ayaa abaan duulihii hawl galku soo jeediyey in isaga iyo ragiisaba loola cararo oo loo daad gureeyo dhanka safaarada Israel.

Waan aqbalay codsigii abaan duulaha si aan uga hor tago in dhibaato kale dhacdo. Maadaama oo uu isagu joogo goobta, waxan aaminay in uu nooga aqoon roonyahay, sidaa awgeed waxan amray in loo daad gureeyo dhanka safaarada isaga iyo dhawr hawl fuliye oo kale. U baxsasho loo baxsado dhanka safaaradu waxay ahayd, badanaana ay tahay, doorashada ugu dambaysa, waxaana loogu tala galay in xageeda loo baxsado marka wax wal oo kaleba socon waayaan.

Si kastaba, waxa aan fasaxay codsigii ahaa in loo cararo xaga safaarada, aniga oo aaminsanaa in daad gureyn hawl fuliyeyaasha loo daad gureeyo dhanka safaarada ay ka hor tegi karto dhibaato kale oo dhacda haddii hawl fuliyeyaashu ay isku dayaan in ay baxsadaan; aniguna ma rabin in boqor Hussein uu dareemo in aan dad badan ku qarinayo meelo kale.

Mishka, oo qaabilsanaa xidhiidhka xaga isgaadhsiinta ee Isreal, ayaa lagu amray in uu hawl fuliyeyaasha u daad gureeyo dhanka safaarada. Wuxu la xidhiidhay safaarada, wuxuuna bilaabay in uu hawl fuliyeyaasha u gudbiyo goob cayiman oo laga qaado si loo geeyo safaarada. Kadibna wuxu u kicitimay dhankaas iyo Hotelkii uu degenaa.

Wakhtigaas aniga way ii caddayd in hawl galkii dhamaaday [fashilmay], isla markaana aan u baahanahay in aan Jordeeniyiinta u gudbiyo sawir buuxa oo ah wixii dhacay. Waxa aan helay war bixin ka hadlaysa sida hawl galku u socdo oo ay ku ladhantahay dareen ah in hawl galkii guul dareystay, waxaanan si deg deg ah u wacay Raysal Wasaaraha.

Netanyahu wuxu telefoonkaygii gaadhay isaga oo kusoo socda xus sanad le ah oo ka dhacayay xarunta taliska Mossad. Waan ku war geliyey khaladka dhacay, waxaanan isku af garanay in aan warbixin siiyo marka uu soo gaadho goobta. Markii uu yimi waxa aanu yeelanay wada tashi hor dhac ah, waxaanu ansixiyey soo jeedintaydii ahayd in aan si deg deg ah ugu duulo Jordan, lana kulmo boqor Hussein, arimahana aad u adkeeyo inta aanay xadka ka bixin.

Adiga oo mahadsan, la soco qayb ta qaybtan xigta.

W/Q: Danny Yatom

W/T: Mohamed Adan (Sammo Omar)